មិនថាជាវិចិត្រសាល លំនៅដ្ឋាន គ្លីនិក ឬក្រុមហ៊ុននោះទេ ការងាររបស់ Kentaro Ishida ជាស្ថាបនិក KIAS ដែលមានមូលដ្ឋាននៅទីក្រុងតូក្យូ បានសម្រេចសមិទ្ធផលផ្នែកស្ថាបត្យកម្មចម្រុះជាច្រើនអស់រយៈកាលយូរមកហើយ។

មូលដ្ឋានគ្រឹះនៃការរចនារបស់លោកគឺជាការរួមបញ្ចូលគ្នាយ៉ាងរលូនរវាងដើមកំណើតជាជនជាតិជប៉ុន និងទស្សនៈសកលរបស់លោក ដែលបានមកពីបទពិសោធន៍នៃការរស់នៅក្នុងប្រទេសជាច្រើន មុនពេលដែល Ishida ចាប់ផ្ដើមសិក្សាស្ថាបត្យកម្មនៅក្នុងទីក្រុងឡុងដ៏ និងបម្រើការងារនៅប្រទេសស្វីសឱ្យ Herzog & de Meuron។

ខណៈពេលដែលស្នាដៃរបស់លោកទទួលបានការបំផុសគំនិតពីរចនាបទរួមបញ្ចូលគ្នារវាងទស្សនៈផ្អែកតាមវប្បធម៌ និងទស្សនៈនៃលំហ ចំណុចដ៏សំខាន់បំផុតមួយនៃស្នាដៃរបស់លោកគឺប្រហែលជាសោភ័ណភាពនៃវប្បធម៌ជប៉ុន ដែលលេចឡើងនៅគ្រប់ផ្នែកទាំងអស់ ដែលនោះគឺជាទស្សនៈនៃភាពមិនល្អឥតខ្ចោះ។ យើងអាចនឹងឃើញវានៅលើផ្ទៃជញ្ជាំងខាងក្រៅទូទៅ ទម្រង់អរូបីរាងកោងនៃដំបូលដែលមានទម្រង់ជាស្រទាប់ ឬភាពអស៊ីមេទ្រីបន្តិចបន្តួចនៃផ្នែកខាងក្នុងសំណង់អគារ។

KIAS ប្រហែលជាត្រូវបានស្គាល់ដោយសាររចនាប័ទ្មលក្ខណៈវប្បធម៌។ Ishida ដែលបានដឹកនាំការរចនាសារមន្ទីរ Perez Art Museum Miami ខណៈពេលបម្រើការងារនៅ Herzog & de Meuron ស្ថិតនៅពីក្រោយការបង្កើតគម្រោងសំខាន់ៗជាច្រើននៅក្នុងប្រទេសជប៉ុន។ គម្រោងទាំងនេះរួមមាន N’s Yard ជាថ្មរាងជ្រុងសាមញ្ញ និងកញ្ចក់ស្រោបនៅក្នុងព្រៃ ដែលមានមុខងារជាសារមន្ទីរឯកជនរបស់សិល្បករជប៉ុន Yoshitomo Nara និងវិចិត្រសាលសហសម័យ Mitsukoshi Contemporary Gallery នៅក្នុងទីក្រុងតូក្យូ។

គុណភាពខ្យល់ និងប្រព័ន្ធខ្យល់ចេញចូលគឺជាការយកចិត្តទុកដាក់ដ៏សំខាន់ជាយូរមកហើយនៅក្នុងការរចនារបស់លោកសម្រាប់សំណង់អគារវប្បធម៌ ដោយជាទូទៅស្ថាបត្យកររូបនេះប្រើប្រាស់បច្ចេកវិទ្យាចុងក្រោយបំផុតដែលលើកស្ទួយដល់និរន្តរភាព ព្រមទាំងធនធានធម្មជាតិនៃពន្លឺនិងខ្យល់។

នៅក្នុងបទសម្ភាសន៍មួយនៅក្នុងស្ទូឌីយ៉ូរបស់លោកនៅសង្កាត់ដ៏ទំនើបមួយឈ្មោះថា ដាយកាន់យ៉ាម៉ា Ishida ពិភាក្សាអំពីតម្លៃនៃខ្យល់បរិសុទ្ធ ការផ្លាស់ប្ដូររបៀបរស់នៅក្នុងអំឡុងពេលជំងឺឆ្លងជាសកលកូវីដ និងការជំរុញដល់ការចាប់យកភាពមិនល្អឥតខ្ចោះជានិរន្តរ។

ភាពមិនល្អឥតខ្ចោះជាសមាសធាតុនៃតុល្យភាព

ស្នាដៃរបស់អ្នកមានជាច្រើនចាប់ពីគម្រោងសារមន្ទីរ និងវិចិត្រសាលធំៗរហូតដល់គម្រោងលំនៅដ្ឋាន។ តើអ្នកចាប់ផ្ដើមគម្រោងនីមួយៗយ៉ាងដូចម្ដេច?
គ្រប់គម្រោងទាំងអស់មានភាពខុសៗគ្នា និងត្រូវចាប់ផ្ដើមពីចំណុចសូន្យ។ យើងព្យាយាមធ្វើការរចនាដោយគ្មានការគិតគ្រោងទុកជាមុន ដោយយើងពិចារណាលើទីតាំង ប្រទេស និងបរិបទជានិច្ច។ ជាពិសេសក្នុងករណីគម្រោងសាងសង់លំនៅដ្ឋាន មនុស្សគ្រប់រូបមានរបៀបរស់នៅខុសៗគ្នា និងមានស្តង់ដារខុសៗគ្នាសម្រាប់គុណភាពជីវិត និងកន្លែងរស់នៅ។ យើងចាំបាច់ត្រូវយល់ពីចំណុចនេះសម្រាប់ជាចំណុចចាប់ផ្ដើម។

តើមានចំណុចទូទៅណាខ្លះដែលគាំទ្រដល់ស្នាដៃរបស់អ្នក?
ចំណុចមួយដែលខ្ញុំតែងតែចាប់អារម្មណ៍គឺសម្ភារសាងសង់ និងរបៀបខុសគ្នាៗនៃការប្រើប្រាស់វា។ ឧទាហរណ៍ ក្នុងគម្រោងលំនៅដ្ឋានមួយនៅតំបន់អូតាវ៉តនៃទីក្រុងតូក្យូ យើងបានរចនាជាន់ទីមួយរបស់អគារ ដោយធ្វើឱ្យវាមានរូបរាងជាប្រអប់ដែលមានជញ្ជាំងផុស ដោយប្រើថ្មកំបោរពណ៌បៃតង។ ផ្ទៃមានលក្ខណៈមិនសូវលេចធ្លោ ប៉ុន្តែបង្កើតបានជាទម្រង់មនុស្ស ដែលកាន់តែដូចធម្មជាតិ។

អ្វីៗគ្រប់យ៉ាងមានភាពល្អឥតខ្ចោះនៅក្នុងពិភពលោក ជាពិសេសទីក្រុងតូក្យូ។ ផ្ទៃនៅគ្រប់កន្លែងមានអនាម័យ និងស្មើល្អ ជាឥទ្ធិពលដែលបង្កើតឡើងដោយការប្រើប្រាស់សម្ភារៈក្លែងក្លាយភាគច្រើន ដូចជាឈើកែច្នៃជាដើម។ ដូច្នេះយើងព្យាយាមជ្រើសរើសយកទិសដៅផ្ទុយពីនេះ និងបង្កើតស្នាដៃដែលមានភាពមិនល្អឥតខ្ចោះបន្តិចបន្តួច។ វាប្រៀបដូចជាបន្ទប់បែបប្រពៃណីជប៉ុនដូច្នេះដែរ ដែលមិនមានទម្រង់ស៊ីមេទ្រីនោះទេ។ ជាធម្មតាមានបន្ទប់តូកូណូម៉ា ជាកន្លែងសក្ការព្រះសម្រាប់វិញ្ញាណដូនតា ត្រូវបានលើកឱ្យខ្ពស់ពីដី 50 mm និងខណ្ឌចែកដោយបង្គោលសសរឈើ។ ចំណុចបន្តិចបន្តួចទាំងនេះធ្វើឱ្យទីកន្លែងនេះកាន់តែមានភាពស្វាគមន៍ និងតុល្យភាព។ ជាទូទៅ យើងប្រើបច្ចេកទេសដែលស្របតាមបរិបទនេះ ដោយធ្វើឱ្យផ្ទៃមានភាពគ្រើមបន្តិច ឬមានលក្ខណៈកាន់តែធម្មជាតិ។

ភាពចាំបាច់នៃការវិវត្តផ្នែកស្ថាបត្យកម្ម

តើសោភ័ណភាព និងវប្បធម៌ជប៉ុនបែបប្រពៃណីមានឥទ្ធិពលចំពោះអ្នកកម្រិតណា?
ខ្ញុំបានរស់នៅក្នុងទីក្រុងបាងកករហូតដល់អាយុបីឆ្នាំ បន្ទាប់ពីនោះខ្ញុំបានចូលរៀននៅក្នុងសាលាបឋមសិក្សានៅទីក្រុងឡូសអេនជេឡេស។ ខ្ញុំបានសិក្សាស្ថាបត្យកម្មនៅក្នុងទីក្រុងឡុងដ៏រយៈពេលប្រាំឆ្នាំ​ហើយបន្ទាប់មកខ្ញុំបានទៅបម្រើការងារនៅប្រទេសស្វីសឱ្យ Herzog & de Meuron រយៈពេលប្រាំបួនឆ្នាំ មុនពេលត្រឡប់មកទីក្រុងតូក្យូនៅឆ្នាំ 2012។ ដូច្នេះវាពិបាកក្នុងការកំណត់ពីការជំរុញចិត្តជាក់លាក់ដែលខ្ញុំទទួលបានខ្លាំងណាស់។ ទស្សនៈនៃសំណង់អគារគឺខុសគ្នាទាំងស្រុងរវាងប្រទេសជប៉ុន និងអឺរ៉ុប។ អគារជប៉ុនមានភាពផុយស្រួយជាង ទន់ជាង ហើយភាគច្រើនសង់ពីឈើ។ សំណង់នៅអឺរ៉ុបមានទំនោររឹងមាំជាង ហើយប្រើថ្ម និងឥដ្ឋ។ ប៉ុន្តែសម្រាប់ខ្ញុំ សមាសធាតុទាំងអស់នេះគឺដូចគ្នា។ ផ្ទុយពីការយល់ឃើញថាខ្ញុំមានវប្បធម៌ជាក់លាក់តែមួយ អ្វីដែលខ្ញុំសង្ឃឹមថានឹងធ្វើនោះគឺជាការរួមបញ្ចូលសមាសធាតុទាំងអស់នេះ ហើយបកស្រាយអត្ថន័យរបស់វាឡើងវិញ ដោយឈានទៅមុខមួយជំហានបន្ថែមទៀតក្នុងការបង្កើតព្រំដែនថ្មី។ ស្ថាបត្យកម្មចាំបាច់ត្រូវមានការវិវត្ត ទោះបីជាវាគឺជាការវិវត្តបន្តិចបន្តួចបំផុតក៏ដោយ។ គ្រប់ចំណុចលម្អិតទាំងអស់ រហូតដល់ដៃទ្វារ គួរតែមានការចោទសួរ។ 

ក្នុងរយៈពេលពីរបីឆ្នាំកន្លងមកនេះ តើជំងឺឆ្លងជាសកលនេះបានប៉ះពាល់ដល់ការងាររបស់អ្នក និងក្ដីប្រាថ្នាអតិថិជនរបស់អ្នកយ៉ាងដូចម្ដេច?
ជាទូទៅ អតិថិជនផ្តោតខ្លាំងលើគុណភាពជីវិតនៅក្នុងផ្ទះរបស់ពួកគេ។ ឧទាហរណ៍ ពួកគេកាន់តែមានការប្រុងប្រយ័ត្នក្នុងការជ្រើសរើសគ្រឿងសង្ហារិម ឬចង់បានអាងងូតទឹកកាន់តែធំ។ ពួកគេចាប់ផ្ដើមពិចារណាលើការនាំយកអ្វីដែលល្អប្រពៃសម្រាប់ជីវិតទៅក្នុងផ្ទះរបស់ពួកគេ។ នេះគឺជាការផ្លាស់ប្ដូរដ៏ធំធេងមួយ។ មនុស្សជាច្រើនក៏កំពុងធ្វើចំណាកចេញពីទីក្រុងទៅតំបន់នានា ដើម្បីទិញផ្ទះផងដែរ។ វិស័យសំណង់កំពុងរីកលូតលាស់ខ្លាំងនៅការីហ្សាវ៉ា [ទីប្រជុំជនរមណីយដ្ឋានលើភ្នំដែលមានចម្ងាយមួយម៉ោងពីទីក្រុងតូក្យូដោយជិះរត់ភ្លើង]។ យើងកំពុងមានគម្រោងផ្ទះពីរ និងវិចិត្រសាលមួយនៅទីនោះ។ 

តួនាទីខ្យល់ក្នុងការរចនា

តើការពិចារណាលើគុណភាពខ្យល់មានសារៈសំខាន់កម្រិតណាក្នុងការរចនារបស់អ្នក ហើយតើនៅដំណាក់កាលណាដែលការរចនានេះត្រូវបានរួមបញ្ចូល?
វាអាស្រ័យលើគម្រោង។ សម្រាប់អគារការិយាល័យ វាមានភាពចាំបាច់ខ្លាំង ដោយសារមានមនុស្សច្រើនប្រើប្រាស់វា។ សម្រាប់ផ្ទះ ការរចនានេះផ្ដោតសំខាន់លើការនាំយកខ្យល់បរិសុទ្ធតាមវិធីធម្មជាតិ។ ជាទូទៅ ជនជាតិជប៉ុនទម្លាប់រស់នៅដោយស្រូបយកខ្យល់មកពីខាងក្រៅជាង។ គំនិតនៃការបង្កើតបង្អួចបានមកពីប្រទេសលោកខាងលិច។ អ្នកចោះប្រហោងនៅលើជញ្ជាំង នោះវាក្លាយជាបង្អួច។ ប៉ុន្តែជនជាតិជប៉ុនដំឡើងទ្វារសូជី និងទ្វារអូសលក្ខណៈប្រពៃណី ដើម្បីអាចបើកចំហផ្ទះរបស់ពួកគេ នៅពេលដែលពួកគេចង់បើក។ ចំណុចនេះមានន័យថា ផ្ទះជប៉ុនជាច្រើនផ្សារភ្ជាប់ជាមួយធម្មជាតិច្រើនជាង ដោយត្រជាក់ខ្លាំងនៅរដូវរងា និងក្ដៅខ្លាំងនៅរដូវក្ដៅស្របតាមខ្យល់ខាងក្រៅ។ នៅក្នុងផ្ទះជប៉ុនសម័យទំនើប មានការប្រើប្រាស់ម៉ាស៊ីនត្រជាក់ច្រើន ហើយបច្ចេកវិទ្យានេះកំពុងវិវត្តយ៉ាងឆាប់រហ័ស។

តើអ្នកជំនះលើបញ្ហាប្រឈមផ្នែកគុណភាពខ្យល់នៅក្នុងគម្រោងរបស់អ្នកយ៉ាងដូចម្ដេច?
ខ្ញុំយល់ថាស្ថាបត្យករគួរតែយល់ដឹងអំពីធម្មជាតិ និងស្វែងរកវិធីដោយប្រយោលក្នុងការប្រើប្រាស់ថាមពលធម្មជាតិរួមជាមួយបច្ចេកវិទ្យា។ ឧទាហរណ៍​ក្នុងរដូវផ្ការីក និងរដូវស្លឹកឈើជ្រុះ អ្នកអាចទាញយកខ្យល់បរិសុទ្ធ ដើម្បីកម្ចាត់កម្ដៅចេញពីសំណង់អគារ។ នៅក្នុងប្រទេសស្វីស ក៏មានបទប្បញ្ញត្តិចែងផងដែរថា ប្រសិនបើដំបូលទាបជាងកម្រិតជាក់លាក់ណាមួយ អ្នកត្រូវតែលាបដំបូលនោះឱ្យមាន “ពណ៌បៃតង” ដើម្បីទប់ស្កាត់ការបាត់បង់កម្ដៅឱ្យមានប្រសិទ្ធភាពបំផុត។ បច្ចុប្បន្ន យើងកំពុងធ្វើការលើគម្រោងមួយនៅអូគីណាវ៉ា។ នៅក្នុងតំបន់ត្រូពិចរងភាគខាងត្បូងទាំងនេះ ជាទូទៅផ្ទះមានគែមដំបូលធំដោយគ្របសំយាបផ្ទះ (ច្រកបើកចំហ) ដែលគ្មានជញ្ជាំង។ វាបង្កើតជាម្លប់ ដែលធ្វើឱ្យផ្នែកនោះត្រជាក់ជាងមុន និងទប់ស្កាត់កម្ដៅផ្លាតពីដី ប៉ុន្តែអ្វីដែលសំខាន់ជាងនេះគឺថា ការរចនាបើកចំហនេះជួយឱ្យប្រព័ន្ធខ្យល់ចេញចូលធម្មជាតិរុញច្រានខ្យល់ក្ដៅទៅខាងក្រៅ។

ការគ្រប់គ្រងសីតុណ្ហភាពក្នុងសំណង់អគារ

តើការច្នៃប្រឌិត និងបច្ចេកវិទ្យានៃគុណភាពខ្យល់ប្រភេទអ្វី ដែលអ្នកប្រើជាទូទៅនៅក្នុងសំណង់អគារដែលអ្នករចនា?
ជាទូទៅយើងប្រើប្រព័ន្ធផ្លាស់ប្ដូរខ្យល់នៅក្នុងវិចិត្រសាល ឬលំនៅដ្ឋានដែលមានពិដានខ្ពស់។ វាដំណើរការដោយបញ្ចេញខ្យល់ត្រជាក់ទៅផ្នែកខាងក្រោមក្នុងល្បឿនយឺតៗ ហើយបន្ទាប់មកត្រូវបាននាំយកទៅផ្នែកដែលត្រូវការខ្យល់ត្រជាក់​តាមរយៈការផ្លាស់ប្ដូរកម្ដៅ។ ចំណុចនេះមានន័យថា អ្នកត្រូវការគ្រប់គ្រងកម្ដៅនៅកន្លែងដែលមានមនុស្សតែប៉ុណ្ណោះ ដែលមានកម្ពស់ប្រហែលពីរម៉ែត្រពីផ្នែកខាងក្រោម មិនមែននៅផ្នែកខាងលើទេ។ ប្រព័ន្ធនេះប្រើថាមពលតិចបំផុត។ យើងបានរួមបញ្ចូលប្រព័ន្ធនេះទៅក្នុងផ្នែករស់នៅចម្បងនៃវីឡា Four Leaves Villa នៅការីហ្សាវ៉ា ដោយសារវាមានពិដានខ្ពស់ ព្រមទាំងនៅក្នុងគម្រោងសារមន្ទីររបស់យើងផងដែរ។

តើចំណុចអ្វីដែលត្រូវពិចារណាសំខាន់បំផុត នៅពេលបង្កើតសំណង់អគារវប្បធម៌?
ជាទូទៅ យើងវិភាគលើប្រភេទវិចិត្រសាលខុសៗគ្នា ចាប់ពីប្រភេទបុរាណរហូតដល់សហសម័យ ដូចជាវិចិត្រសាល Fondation Beyeler នៅក្នុងប្រទេសស្វីស និងវិចិត្រសាល Tate Modern នៅទីក្រុងឡុងដ៏ជាដើម។ Beyeler គឺជាសារមន្ទីរដ៏អស្ចារ្យ ដែលត្រូវបានរៀបចំយ៉ាងឆ្លាតវៃដោយប្រើប្រព័ន្ធជញ្ជាំងដែលមានភាពបត់បែន។ បន្ទះបញ្ចេញខ្យល់របស់ម៉ាស៊ីនត្រជាក់ត្រូវបានដំឡើងនៅលើពាសពេញផ្ទៃឥដ្ឋប្រហែល 1.7 m ពីគ្នា ដូច្នេះប្រសិនបើអ្នកផ្លាស់ទីជញ្ជាំង អ្នកនៅតែអាចគ្រប់គ្រងសីតុណ្ហភាពកន្លែងទាំងមូលបានដដែល។ ពន្លឺធម្មជាតិចូលក្នុងវិចិត្រសាលទាំងអស់របស់សារមន្ទីរនេះ តាមរយៈការប្រើប្រាស់របាំង និងរនាំងការពារពន្លឺ។ ហើយក៏មានទេសភាពស្រស់ស្អាតផងដែរ។ វិចិត្រសាលត្រូវតែសមស្របនឹងទីតាំងរបស់វា។ សាកគិតមើលលើស្នាដៃរបស់ Yayoi Kusama នៅណូស៊ីម៉ាថាវាគួរឱ្យចងចាំកម្រិតណា ដោយសារទីតាំងធម្មជាតិរបស់វា។ ឧទាហរណ៍មួយផ្សេងទៀតគឺវិចិត្រសាល Giacometti Gallery នៅក្នុងសារមន្ទីរ Louisiana Museum of Modern Art ក្នុងទីក្រុងកូប៉ិនហាក ដែលមានកម្រាលឥដ្ឋ និងបង្អួចធំ ដែលបង្ហាញទេសភាពធម្មជាតិ។ ទាំងពន្លឺធម្មជាតិ ទេសភាព និងសីតុណ្ហភាព សុទ្ធសឹងតែមានសារៈសំខាន់ទាំងអស់។

ដែនកំណត់នៃប្រព័ន្ធខ្យល់ចេញចូល

តើមានចំណុចខុសគ្នាសំខាន់ៗអ្វីខ្លះរវាងប្រព័ន្ធខ្យល់ចេញចូលរបស់ជប៉ុន និងលោកខាងលិច?
ការិយាល័យនៅអឺរ៉ុបមានទំនោរប្រើប្រាស់ប្រព័ន្ធខ្យល់ចេញចូល និងពន្លឺធម្មជាតិ ដែលពិបាកនឹងធ្វើបាននៅក្នុងអគារខ្ពស់ៗក្នុងទីក្រុងតូក្យូ។ ជាទូទៅនៅប្រទេសជប៉ុន ការិយាល័យបំពាក់អំពូលភ្លើងដើម្បីបំភ្លឺ ដូចសហរដ្ឋអាមេរិកដែរ។ ប៉ុន្តែនៅអឺរ៉ុបមិនអនុញ្ញាតឱ្យរចនាការិយាល័យដោយគ្មានពន្លឺធម្មជាតិទេ ដោយសារហេតុផលពាក់ព័ន្ធនឹងសុខភាពផ្លូវចិត្ត។ ខ្ញុំបានធ្វើការនៅក្នុងអគារខ្ពស់មួយនៅទីក្រុងប៉ារីសនៅក្នុងកន្លែងដែលមានរាងស្ដើង ដូច្នេះយើងបានគូរគ្រោងកន្លែងដែលមានរាងកោងប្រវែង 12 ម៉ែត្រចំនួនពីរ ដោយមានប្រអប់ជណ្ដើរយន្តនៅកណ្ដាល។ ខ្ញុំគិតថាការិយាល័យជប៉ុននៅតែមានលទ្ធភាពបង្កើនពន្លឺធម្មជាតិ និងគុណភាពខ្យល់បាននៅឡើយ។ បច្ចុប្បន្ននេះ ជនជាតិជប៉ុនកំពុងផ្លាស់ប្ដូររបៀបរស់នៅរបស់ពួកគេ ដោយសារជំងឺឆ្លងជាសកល និងក្ដីប្រាថ្នាចង់បានបរិយាកាសបែបធម្មជាតិ ទោះបីជានៅកន្លែងធ្វើការក៏ដោយ។

តើអ្នកយល់យ៉ាងណាចំពោះបច្ចេកវិទ្យា nanoeX?    
ជាការពិត យើងបានប្រើបច្ចេកវិទ្យានេះនៅក្នុងគម្រោងមួយចំនួនរបស់យើង។ គុណភាព និងបច្ចេកវិទ្យាម៉ាស៊ីនត្រជាក់ជប៉ុនពិតជាអស្ចារ្យណាស់។ ប្រព័ន្ធម៉ាស៊ីនត្រជាក់គឺពិតជាការបង្កើតដែលផ្ដល់នូវវិធីចំណាយដ៏មានប្រសិទ្ធភាព ក្នុងការគ្រប់គ្រងសីតុណ្ហភាពក្នុងសំណង់អគារ ហើយគ្មានអ្វីអាចជំនួសវាបានទេ។ បច្ចេកវិទ្យាម៉ាស៊ីនត្រជាក់មួយចំនួនក៏ផ្ដល់ប្រព័ន្ធខ្យល់ចេញចូលផងដែរ ដោយនាំយកខ្យល់ខាងក្រៅមកក្នុង ហើយក៏អាចកម្ចាត់សំណើម និងសម្អាតកន្លែងនោះផងដែរ។ ប្រភេទបច្ចេកវិទ្យានេះជួយដល់អគារ ដែលជាទូទៅមិនបំពាក់ប្រព័ន្ធខ្យល់ចេញចូលធម្មជាតិ ឬមានបង្អួចតូច ជាពិសេសនៅក្នុងប្រទេសជប៉ុន។ ម៉ាស៊ីនត្រជាក់ពិតជាជួយផ្ដល់គុណភាពខ្យល់ដែលយើងប្រាថ្នាចង់បាន។ ប្រជាជនជប៉ុនយកចិត្តទុកដាក់ខ្លាំងចំពោះគុណភាពខ្យល់ មិនមែនដោយសារតែជំងឺឆ្លងជាសកលប៉ុណ្ណោះទេ តែក៏ដោយសារការប្រតិកម្មនឹងលម្អង ដែលជាលទ្ធផលនៃការដាំដើមតាត្រៅនៅលើភ្នំចាប់តាំងពីសម័យអេដូមកម្ល៉េះផងដែរ។ នៅថ្ងៃអនាគត ខ្ញុំគិតថាយើងនឹងបន្តសង្កេតឃើញការកើនឡើងនៃសារៈសំខាន់ ដែលផ្ដោតលើគុណភាពខ្យល់ នៅពេលប្រជាជនធ្វើចំណាកចេញពីទីក្រុងធំៗទៅរស់នៅលើភ្នំ ឬទីក្រុងតូចៗដែលមានខ្យល់ស្រស់ថ្លាជាង។ ប្រព័ន្ធខ្យល់ចេញចូលធម្មជាតិ និងគុណភាពខ្យល់ល្អកាន់តែមានសារៈសំខាន់សម្រាប់ប្រជាជនជប៉ុនជាច្រើន។

ប្រវត្តិរូប

អត្ថបទចុងក្រោយបំផុត

សូមចុចត្រង់នេះ ដើម្បីទាក់ទងមកយើងខ្ញុំពាក់ព័ន្ធនឹងផលិតផលដែលប្រើបច្ចេកវិទ្យា nanoe™ X